بعد انقطاع طويل عنك ارسل لك هذه الرسالة علني اسمع منك رداً يشفيني ....
أولاً تحية طيبة ..
ارسل لك هذه الرسالة و كل استفهامات هذا الزمن الغريب تدور في خلدي, هل انقلبت الموازين؟ هل تغيرت الحياة؟ هي اصبح المنكر معروفاً والمعروف منكراً !!!
كلها امور غريبة تجول في خاطري و لا اجد من احدثه بها فقررت أن الجئ أليك علك تدلني على الصواب,علك تحدثني إن كُنتُ مخطئاً فأتجه لأكون ضمن قطار المؤيدين بدل الحيرة التي أقلقت تفكيري وادخلتني في دوامة من الجزع.
اخي وصديقي قبل اربع سنوات عندما تشكلت الحكومة العراقية وضعوا حكومة بلا وزير دفاع ولا وزير داخلية كيف تدير نفسها الله اعلم وبعد فترة ما يقارب السنة و نصف السنة ظهر السيد رئيس الوزراء السابق على شاشات التلفاز يتفاخر بأن الحكومة ناجحة بدون هؤلاء الوزراء وهذا أن دل على شيء فأنه يدل على امكانية خرافية في العمل ,ها للعلم چانت المفخاخات مستمرة ما كو انقطاع يا خوية .
المهم بعد هذا التصريح ظهرت عندنا ايام الاسبوع الشهيرة الي هي الاربعاء الدامي والاحد الدامي والاثنين الاسود والثلاثاء الأحمر... خوية لا أگلك ولا تگلي قبطن اسبوع و يمكن أكثر شوية .
على كلٍ هسه اجتنا حكومة جديدة و يحاول رئيس الوزراء الجديد أن يخلي وزراء في هذه الوزارات لكن كل ما يخلي وزراء الكتل ما تقبل بيهم كل ما يقترح وزارء جدد الكتل ما تتوافق عليهم و فوكاها الكل يصيح هذا فاشل هذا فاشل هذا فاشل .
ما تدري شلون قيموا والاكثر من هذا اكو تيار أخر يصيح يا ريت كون يرجع النا رئيس الوزراء السابق على اساس چان ذاك ( مشرم تراچيها ) للترجمة ( مشرم تراچيها مثل عراقي يطلق على الشخص الي يعمل ما لا يستطيع عملة الآخرون ) .
و هسة أنا يا اخوي واگع بحيرة مو طبيعية ما اعرف شلون اطلع منها و صاير بين أمرين أوَلُها امر من ثانيها ...على العشاء شأسوي بيض بالطماطة لو بتيته سلك ؟؟؟؟؟؟؟؟؟
ليست هناك تعليقات:
إرسال تعليق